Xantar 2025 afrontou hoxe a súa segunda xornada cun programa cheo de actividade, no que coincidiron showcookings, catas comentadas, degustacións, concursos, exhibicións e as celebracións dos tradicionais “Días Dedicados”.
A feira consolidou unha vez máis o seu papel como gran escaparate gastronómico da Eurorrexión.
Xantar 2025 vive unha intensa segunda xornada marcada polos “Días Dedicados” e os Platos de Ouro
A Praza de Abastos de Ourense, coa colaboración da Xunta de Galicia, promoveu un showcooking centrado nos Produtos de Mercado, dirixido polo chef Miguel González.
O conselleiro de Emprego, Comercio e Emigración, José González, asistiu acompañado polo director xeral de Comercio, Gabriel Alén, apoiando así a divulgación do produto local e de proximidade.
A xornada contou tamén coa visita da directora xeral de Formación Profesional, Eugenia Pérez, quen percorreu o stand do Centro Galego de Innovación da FP. Alí, alumnado de diferentes centros da provincia ofreceu exhibicións continuas de cociña, repostaría e coctelería.
Días dedicados: Vila Real, Sober e Muras
Este venres rendeuse homenaxe a destinos que levan 26 anos participando de forma ininterrompida en Xantar, desde a súa primeira edición.
- Vila Real (Portugal), cidade irmandada con Ourense desde hai 42 anos, exhibiu produtos tan emblemáticos como o Covilhete, as Cristas de Galo ou os seus vinhos verdes. Non faltou a célebre cerámica negra de Bisalhães, declarada Patrimonio Cultural Inmaterial da Humanidade pola UNESCO.
- O Concello de Sober protagonizou outro dos días dedicados, promocionando os seus recoñecidos viños de Amandi e presentando o “Proxecto Rosca de Sober”, impulsado pola Consellería do Medio Rural. Esta iniciativa busca documentar e preservar a autenticidade deste produto, perfeccionar sistemas de elaboración e explorar novos usos culinarios que o impulsen cara á gastronomía contemporánea.
- O terceiro destino destacado foi o Concello de Muras (Lugo), participante por segundo ano consecutivo e centrado na promoción de produtos de montaña como a carne de Poldro Pura Raza Galega e a súa mel.
Degustacións, talleres e un sabor inesperado
A programación incluíu máis dunha vintena de talleres de cociña, catas comentadas e degustacións. Entre as máis sorprendentes estivo a presentada pola Cámara de Comercio e Industria de Angra do Heroísmo: carne das Azores procedente de vacas de 19 anos, que espertou tanto interese que motivou a organización dunha nova degustación mañá ás 12.30 h.
Gala de Platos de Oro e Medallas de Xantar
Como xa é tradición, Xantar acolleu a gala de Radio Turismo na que se entregaron os Platos de Oro aos restaurantes destacados da provincia e os Gorros Blancos a chefs ourensáns. Ademais, Expourense outorgou as súas Medallas de Ouro, recoñecendo a entidades e persoas comprometidas coa feira.
O acto contou coa presenza do delegado territorial da Xunta, Manuel Pardo, e do presidente do Inorde, Rosendo Fernández.
Platos de Oro
- Restaurante A Feira (Market do Estadio Santiago Bernabéu – Madrid)
- O Campanario (Nogueira de Ramuín)
- Dos Puertas (Ourense)
Gorros Blancos
- Javier Silva Díaz e Francisco Silva González (Restaurante Lusitano, Lobios)
- José Antonio González Gallego (Atarazana)
Medallas de Ouro de Xantar
- UHO – Unión de Hosteleros de Ourense
- María Doallo Freire, xornalista de La Voz de Galicia (in memoriam)