Xantar 2025 celebrou hoxe unha terceira xornada marcada pola gastronomía e a música de Galicia, Portugal e Venezuela, país que este ano se incorporou ao salón e convocou á comunidade venezolana da provincia de Ourense para participar activamente no evento.
A feira abriu a mañá cun Mercado Enogastronómico moi concurrido no que os visitantes buscaron tequeños, cachapas e arepas, tres dos produtos estrela desta edición. A sesión incluíu tamén o concerto da artista venezolana Maira, que puxo ritmo e cor a este espazo.
Gran participación en Xantar 2025 nun sábado cheo de sabores e tradición
As actuacións continuaron ao longo do día cos grupos “@de vinho”, chegado desde O Grove, e o Rancho Folclórico de Pinhao de Alijó (Portugal). Ambos encheron de son e ambiente os corredores do recinto.
Entre música e degustacións, o público fixo parada nos stands, destacando o do Concello da Cañiza, que presentou a 60ª edición da súa Festa do Xamón. Esta celebración está prevista para o 15 de agosto de 2026. A degustación incluiu xamón acompañado de queixo, mel e viño, mentres que o concello de Vilariño de Conso se encargou da sobremesa con montonico, bicos e castañas asadas.
A xornada reuniu tamén o XXI Encontro Internacional de Cofradías Gastronómicas e Enófilas. Este encontro congregou en Expourense unha trintena de confrarías de España, Portugal, Francia e Ecuador, reforzando así o carácter internacional dun evento que continúa medrando en participación e repercusión.
Outro dos momentos destacados foi a presentación do proxecto “Sabedoras. Cociñas e cociñeiras memorables do Ribeiro – Carballiño”, que puxo en valor o papel das mulleres na historia da gastronomía galega. A chef Begoña Vázquez protagonizou un showcooking acompañada por varias das sabedoras que dan vida a esta guía culinaria. A mesma está centrada nas receitas tradicionais transmitidas xeración tras xeración nas casas da comarca.