Xantar 2025 pechou esta tarde a súa 26ª edición tras catro días nos que 75 expositores mostraron os seus recursos turísticos e gastronómicos, e nos que o Mercado Enogastronómico se consolidou como a gran novidade deste ano grazas aos concertos diarios.
O salón ofreceu máis de 142 actividades, distribuídas en dúas aulas gastronómicas, unha aula de cata e outra dedicada en exclusiva a Estrella Galicia.
Xantar 2025 pecha unha edición con 12.000 visitas e máis de 140 actividades
Os obradoiros, degustacións e catas completáronse desde o primeiro ata o último día, reunindo máis de 4.000 asistentes. O director de Expourense, Rogelio Martínez, salientou que “Xantar é xa moito máis que un lugar onde comer ou cear; é un punto de encontro e de formación”.
O acto de clausura estivo presidido polo presidente do Parlamento de Galicia, Miguel Ángel Santalices Vieira, que destacou o papel da dieta galega na lonxevidade ourensá e o obxectivo da provincia de ser recoñecida como Zona Azul, con 334 persoas centenarias. Participaron tamén a conselleira do Mar, Marta Villaverde; o presidente da Deputación de Ourense, Luis Menor; e o director da Axencia de Turismo de Galicia, Xosé Manuel Merelles.
A última xornada incluíu a celebración do Día do Concello de A Arnoia, no que o edil de Turismo, José Manuel Martínez, reivindicou a importancia de investir no rural para garantir o relevo xeracional e transformar a agricultura nun “negocio estable”. Xantar serviu igualmente de espazo de promoción para destinos turísticos como O Grove, que empregan a gastronomía para desestacionalizar a súa oferta.
Tamén se fixo entrega dunha placa conmemorativa a Carlos Rodríguez, expresidente do Consello Regulador da IXP Pan de Cea, polo apoio prestado ao salón durante 26 anos.
O evento reafirmou o seu modelo de cooperación público-privada, contando co apoio da Xunta, deputacións, INORDE, centros de FP e empresas como Gadis, Coren, Estrella Galicia, Cabreiroá, Grupo Cuevas e Bricocentro, ademais de colaboracións como ANFACO-CYTMA, Green Ambiental e a Praza de Abastos de Ourense. A presenza do expositor Patatas Jalys e o concurso DevoraJalys repartiron máis de 8.000 bolsas de patacas entre o público.
Premios Grupo Cuevas
Na clausura entregouse o premio do XIII Concurso Xantar Gourmet, organizado polo Grupo Cuevas, que recoñeceu como mellor receita elaborada con castaña a proposta “Galicia – Kiev” do chef noiés Marcos Arufe Blanco, composta por un milhojas de mazá e améndoas con base de turrón de castañas acompañado dun coctel típico de Kiev elaborado con almíbar do mesmo produto.
A próxima cita en Expourense será esta mesma semana coa 9ª edición de ANTIQ AURIA, que se celebrará do 28 ao 30 de novembro.