A 42ª Mostra Internacional de Teatro de Ribadavia continúa este xoves, 23 de xullo, cunha programación que combina creación en proceso, intervención no espazo público e teatro de sala.
A xornada reunirá tres propostas que exploran a relación co territorio, a memoria e a comunidade.
A MIT combina creación, participación e teatro de sala
Ás 20:00 h, o Auditorio Manuel María da Casa da Cultura acollerá Ribadavia 26, de La Volátil (Galicia/Andalucía). A peza culmina a residencia artística desenvolvida polo colectivo durante a MIT. O espectáculo nace do encontro coa vila e os seus habitantes, a partir da escoita, a memoria compartida e a participación da comunidade.
A programación continuará ás 21:00 h na Praza Buxán con Acción Pálpito, da compañía valenciana Diàleg Obert. A proposta converte o espazo público nun escenario compartido e sitúa o encontro e a participación no centro da experiencia escénica.
A xornada pechará ás 23:00 h no Auditorio do Castelo con Bioconstrución, de Ibuprofeno Teatro. A montaxe reflexiona sobre o territorio, os modos de habitar e as comunidades humanas. O espectáculo contará con interpretación en lingua de signos e audiodescrición.
