Funergal celebrou hoxe a segunda xornada da súa décimo terceira edición en Expourense, centrada nas reunións de negocio, a innovación e a entrega de distincións internacionais no sector funerario.
A actividade comercial concentrou gran parte da programación, con encontros entre expositores e profesionais chegados de distintos países, reforzando o carácter internacional da feira.
Funergal impulsa a súa proxección internacional
Un dos actos principais foi a entrega das condecoracións Honoris Causa Everest, promovidas pola Fundación Honor a quien Honor Merece de México. Foron recoñecidas as empresas Vidanova (Ecuador), Servicios Funerarios López (Chile), Funeraria Fuchslocher (Chile) e Industria de Capillas Fúnebres Velasco (Perú), todas elas referentes nos seus países e interesadas en colaboracións en Europa para repatriacións e servizos internacionais.
Tamén se recoñeceu o traballo da xornalista Arax Gil, correspondente da revista mexicana El Guardián de los Muertos, pola súa cobertura do evento.
A fundación, en colaboración con Expourense, entregou ademais diplomas a cinco expositores. Entre eles, Artavia, Único, Belartfune, Neomemorial e Santos e Godinho, destacados pola súa fidelidade á feira, innovación e achegas ao sector.
No ámbito da innovación, a empresa Aerodrop presentou o servizo AD-Funerarias. Esta aplicación integra a xestión completa das funerarias nun único sistema accesible desde calquera dispositivo, co obxectivo de simplificar a operativa diaria.