As mil alegacións presentadas contra a planta de biometano en Xunqueira de Ambía evidencian, desde a primeira liña, o forte rexeitamento social aos plans de Ence na comarca da Limia.
Nas últimas tres semanas, veciñas e veciños das aldeas afectadas de Xunqueira, Sandiás e Xinzo, activistas do centro social Alvariça de Allariz e membros dos colectivos ecoloxistas Stop Eólicos Xurés Celanova, MEL e a plataforma Auga Limpa Xa! mobilizáronse para frear un proxecto que consideran prexudicial para o territorio.
Mil alegacións frean a planta de biometano proxectada por Ence en Xunqueira
Este movemento cidadán contou tamén co apoio de varios puntos de recollida de alegacións exprés nas comarcas de Allariz, A Limia e Celanova. Os mesmos facilitaron a entrega dunha milleira de escritos contra a planta de produción de biometano e a instalación fotovoltaica asociada.
O proxecto situaríase en Xunqueira de Ambía, á beira da Zona de Protección de Aves da Lagoa de Antela, un espazo ambientalmente sensible.
A documentación rexistrouse en concellos da contorna e na Subdelegación do Goberno en Ourense. As alegacións, baseadas nos informes críticos da asociación ecoloxista Petón do Lobo e do BNG, sintetizan nunha única páxina os principais riscos ambientais e sociais asociados ao plan. Sinalan que a suposta “solución” para a xestión dos xurros podería agravar a contaminación por nitratos nas augas da Limia. Esta contaminación é un problema que continúa sen resposta efectiva por parte das administracións competentes.
Os escritos tamén inciden nas eivas detectadas na fase de exposición pública e alertan da acumulación de proxectos extractivistas. Esto sucedería nunha comarca xa sometida a forte presión ambiental. Segundo os colectivos mobilizados, esta estratexia compromete a saúde dos acuíferos e das masas de auga superficiais, con impactos directos sobre a cidadanía.
Ademais das alegacións cidadás, tamén presentaron escritos de oposición o goberno municipal de Xunqueira de Ambía, a Sociedade Galega de Historia Natural, o BNG e Petón do Lobo, polo que a cifra final superará amplamente o millar.