Sandiás achegou este mércores aos máis cativos á paisaxe da Limia e da Lagoa de Antela a través da mirada de Ramón Otero Pedrayo.
O Centro de Interpretación da Lagoa de Antela acolleu o obradoiro “A linguaxe da paisaxe”, organizado polo Proxecto Furgoteca no marco do Ano Oteriano 2026.
Otero Pedrayo guía aos máis cativos pola paisaxe da Limia
A actividade, aberta a todos os públicos, combinou xeografía, literatura, poesía, historia e arte nunha sesión participativa de 60 minutos. O obxectivo foi dar a coñecer a figura e o legado de Otero Pedrayo e fomentar entre os nenos e nenas o respecto polo territorio e o sentimento de pertenza.
A sesión comezou cunha carta simbólica do escritor “desde o pasado”. Despois, os participantes realizaron exercicios de observación e xogos con palabras vinculadas á paisaxe, como touza, sebes ou chaira.
Un dos momentos centrais foi a elaboración dun mapa colectivo da Lagoa de Antela. Nel representaron a fauna e flora da antiga lagoa e incorporaron frases das obras de Otero Pedrayo relacionadas coa Limia.
A arquitecta Mar Penela, especializada en educación e paisaxe, conduciu o obradoiro cunha metodoloxía activa e grupal baseada no mapa da Lagoa de Antela elaborado polo Proxecto Terra, iniciativa do Colexio Oficial de Arquitectos de Galicia.
A proposta tamén permitiu reflexionar sobre a transformación da paisaxe limiá tras a desaparición da histórica Lagoa de Antela e sobre a importancia da súa memoria.
Deste xeito, Sandiás converteu o Centro de Interpretación nun espazo para coñecer, comprender e sentir a paisaxe da Limia. A actividade serviu para achegar ás novas xeracións o patrimonio natural, cultural e histórico da comarca.