A VI Exposición de Pintura de Sandiás reúne 45 obras realizadas polo alumnado do Obradoiro de Pintura do programa municipal Mantente Activo, consolidándose como unha das principais citas culturais do verán no municipio.
Esta mostra permanecerá aberta ao público ata o 20 de agosto na Sala de Exposicións da Casa da Cultura.
A VI Exposición de Pintura de Sandiás reúne 45 obras de artistas locais
A exposición abriu as súas portas o pasado 10 de agosto cun acto inaugural ao que asistiron máis de medio cento de veciños e veciñas de Sandiás e da comarca da Limia. As creacións son obra dos 32 participantes do obradoiro, distribuídos en tres grupos, que ao longo do ano desenvolveron esta actividade dentro do programa municipal.
O alcalde de Sandiás, Felipe Traveso, destacou durante a inauguración a consolidación da iniciativa. «Os seis anos consecutivos do obradoiro e da exposición de pintura, a gran participación existente e a impronta especial que lle achega o artista plástico Xosé Eladio», sinalou.
O coordinador do obradoiro presentou as obras expostas e explicou que a principal novidade desta sexta edición é a incorporación da pintura acrílica. Esta técnica permitiu ao alumnado experimentar con novas formas de expresión, destacando polas texturas, as pinceladas e a intensidade cromática.
En representación dos participantes, Chus Teijeiro agradeceu a asistencia do público e recoñeceu o apoio do Concello por manter durante seis anos esta proposta cultural. A mesma permite a persoas de diferentes idades descubrir e desenvolver a súa creatividade.
Exposición de temáticas variadas
A exposición ofrece unha ampla variedade de traballos realizados en óleo, acrílico e acuarela. Entre as temáticas representadas figuran paisaxes, retratos, bodegóns, flores, escenas da natureza e composicións de inspiración fantástica. As obras inclúen beiras de río, faros, amenceres, muíños, o burro de Juan Ramón Jiménez, xarróns, sirenas, centauros, bailaoras de flamenco, motivos tropicais, matrioskas, bailarinas ou pescadores.
A mostra tamén destaca pola incorporación, por primeira vez, de nenos, nenas e mozos, ampliando o carácter interxeracional da actividade. Entre eles atópase Ariana, gañadora do Concurso de Cartaces do Entroido Infantil de Xinzo de Limia.
A VI Exposición de Pintura poderá visitarse ata o 20 de agosto, de martes a domingo, en horario de 16:00 a 20:00 horas, na Sala de Exposicións da Casa da Cultura de Sandiás.